أكيد في كتير منكم شاف مسلسل إلا أنا و حكاية جميلة عوض الي كانت مصابة بالبهاق وجي ف باله سؤال وهو : هو المرض ده ليه أسباب ؟
أه ليه أسباب، وسببه خلل صبغي بيحصل وبيسبب تحطيم الخلايا (القتامينية) ودي الي بتنتج الصبغة في الجلد والأغشية المخاطية ف لما بتتحطم الخلايا دي بيظهر رقع بيضاء في أماكن مختلفه من الجلد وعلي الجسم وكمان الشعر الي بيطلع في الأماكن دي بيكون أبيض.
وأنت فجأه كده هتلاقي بقع بتتكون فوق جلدك وفي شعرك وحوالين الفم والشفاه وحوالين العين.

طب وايه الي بيخلي الخلل الصبغي ده يحصل من الأساس ؟
هو في مرضي بتقول أن السبب هو تعرضهم لحروق شمس شديدة، وفي الي بيقول أن السبب هو تعرضهم لمشاكل نفسية وعاطفية زي مثلا موت شخص قريب منهم أو ابتعادهم عن شخص او اي سبب أذاهم في حياتهم عمومًا وأنه من الزعل..
طب وكلام الطب أيه ؟
شوف يسيدي الاطباء والباحثين عندهم (نظريات) كتير منها مثلا أن الآفراد المصابين بالبهاق عندهم أجسام مضاده حطمت الخلايا القتامينية، وفي نظرية بتقول أن الخلايا القتامينية هيا الي دمرت نفسها بنفسها، وفي تقارير بتقول أن فعلا حالات حروق الشمس والأزمات العاطفية بتسبب البهاق، يعني انت لو زعلت جامد وأتعرضت للأكتئاب ممكن تُصاب بالبهاق.
ده غير أن البهاق نفسة بيزيد لما المريض بيزعل أو بيضايق.
انت متخيل بقي أنه لما يكون عايش في مجتمع متنمر زي مجتمعنا حالته هتبقي عاملة ازاي؟
وكل كلمة ونظره منك حتي لو بسيطة هتأثر فية بالسلب وعلي حالتة ازاي؟ .
طب ومين معرض بشكل كبير للإصابة بالمرض. ؟
هو نسبة الإصابة بالبهاق كإجمالي في العالم كله بتوصل ل 1_2 % من البشر وبيبدأ المرض في 50% من الحالات قبل سن ال20 وفي 35% من الحالات بتكون وراثية يعني يكون في حد من عيلتك مُصاب بالمرض وكمثال : في المسلسل جميلة عرض كانت مصابة بية زي خالتها.
وبيكون عند الشخص المصاب بالبهاق استعداد اكتر من اي شخص للإصابة بأمراض المناعة الذاتية زي (فقر الدم ومرض أديسون).
وفي من 40ل 50 مليون شخص من البشر مصابين بالبهاق وفي أمريكا بس في من 2 ل 5 مليون شخص مصاب بيه وأشهر شخص إتصاب بالمرض (مايكل جاكسون) الي كان بيخبية بالمكياج والميكب لحد ما مات بيه وكمان كمثال لشخص مصري (رامي جمال).
والبهاق ممكن يكون وراثي زي ما قولتلكم يعني ينتقل من الآباء للأبناء، بس في نفس الوقت هو ممكن يجي لشخص فجأه ويكون هو أول واحد في عيلته يُصاب بالبهاق، ووقتها هيكون عنده نسبة عالية أنه لو أتجوز هينتقل لابنائة..

طب أية هيا أعراض البهاق ؟
هو بداية البهاق خالص هي، ظهور بقع بيضاء في الأماكن المكشوفة يعني (الايد والرجل والوجه والشفاه) وبعدين بيبدأ ينتقل للفم والعيون والأعضاء التناسلية.
وغير البقع البيضاء الشخص هيصاب بأعراض الشيب المبكر في فروة الرأس والرموش والحواجب واللحية.
وأية هيا أنواع البهاق ؟
1_ البهاق الطرفي وده الي بيكون ظاهر بس في الشفاه والأطراف والاعضاء التناسلية.
2_ البهاق المنتشر وده الي بيشمل معظم الجسم.
3_ البهاق القطعي.
4_البهاق الثابت، وده الي بيستمر زي ما هو ولا بيقل ولا بيزيد.
5_ بهاق مرض حالة كوبنز.
5_ بهاق الشامة الهالية.
طب وفي علاج للبهاق ؟
أه أكيد في علاج بس بيتوقف علي نوع البهاق يعني لو بهاق بقعي بيكون ليه علاج بسهولة أما لو طرفي ف الموضوع هيبقا صعب شوية، والعلاج ده بيحصل بطريقتين :
1_ الاسترجاع اللوني.
وهنا بنرجع اللون بالعلاج أو الجراحة.
يعني مثلا في كريمات للبهاق ومنهم (الستروئيدات والكورتيزون ومركبات السورالين والسكودوكتاليز).
2_ زراعة الخلايا الصبغية .
وهنا بيتم فصل الخلايا القتامينية عن الجسم وتركيزها في مختبرات وإعاده زراعتها مره تانية في الأماكن المصابة بالمرض ودي طريقة بتستخدم في أمريكا.
ده غير أن موضوع العلاج بقي أسهل وفي تقارير أتعملت في 2008 وأدت لاكتشاف دواء جديد في (كوبا) مستخلص من (المشيمة البشرية) والدواء ده اتطور وبقا علي شكل غسول بيستخدم للجسم أسمه (Melagenina Plus) وده نجح مع 86% من الحالات ونقدر نقول إنه فعلا دواء معتمد لعلاج البهاق.
وفي اكتر من طريقة للعلاج كمان زي.
1_ العلاج بأجهزة (PUVA).
2_ العلاج بالأشعة فوق البنفسجية ذات الحزمة الضيقة.
3_ العلاج الليزري.
4_ العلاج بالجراحة.

وبس، والمرض مش معدي خالص زي ما احنا فاكرين هنا.
يعني بشوف ناس بتخاف تسلم علي الشخص الي عنده بهاق وفي الي مش بيتعامل معاهم ولا بياكل معاهم وبيقول انه (بيقرف) مع أنهم زيهم زيك وانت ممكن يجيلك المرض في اي وقت عادي، وأنت بتصرفاتك دي بتأثر علي الي قدامك وبتخليه يحس أن الي عنده ده عيب وأنه لازم يستخبي من الكون كله، مع أن الي عنده عمره ما كان عيب او شئ يعبيه بالعكس دي حالة مرضية زي اي حاله تانية، والمفروض نقف جنبه ونشجعه علي العلاج ونساعده أنه يخرج ويتعامل طبيعي ومنحسسهوش انه فية حاجه غريبة عننا، مش العكس مش ندمره سواء بكلامنا أو نظرتنا، انا شايفه مرض طبيعي زيه زي (النمش) ومفهوش اي حاجه غريبة ولا اي حاجه وحشة بالعكس ده بيخلي الشخص مختلف ومميز وملامحه أجمل.

ويارب نفهم كلنا كده وبالذات الآجيال الجديدة.
وعجبني جدا فكرة مسلسل (إلا انا) حكاية (لازم إعيش) ، وعجبني تجسيد جميلة عوض للدور وللشخصية ونجلاء بدر وكل الممثلين بصراحة وعرضو فكرة (البهاق) بشكل جميل والمسلسل بيوصلك رسالة وهي:
إنك لازم تشوف نفسك جميل زي ما أنت ، وأن كل واحد فينا مهما كان جميل ف هو فية حاجه بيخبيها عن الكل وفي حاجه في شكله مضيقاه وده مش بسببة لا ده بسبب تنمر الي حوالية ، يعني كمثال لو عندك حبوب في وشك وحد قالك علي الموضوع ده مره ف التانيه هتلاقي نفسك بتخبيها وشايف انك مش حلو بسببها.
مع أنها ممكن تكون هيا الي بتميزك عن الكل ومفيش أي إنسان وحش بس تنمر البشر هو الي بيخلي في انسان وحش..
أحنا لازم نوعي الطفل ونوعي نفسنا، ولازم نخلي بالنا من كل كلمة بتخرج مننا ولازم نعرف انها ممكن تدمر الي قدامنا.
ولو أنت لسه مشوفتش المسلسل شوفه هيعجبك جدا وأعتقد هتلاقيه موجود علي اليوتيوب