شوف يسيدي وركز معايا عشان تفهم، الحوار كله أن سنه 1954 كان في واحد اسمه "هيو إيفيرت" قالك أن في أكوان متوازية شبه كوننا بالظبط وقال كمان انها ليها علاقه بينا لأن في كون رئيسي متفرع منه كل الاكوان التانيه ومنهم كوننا وكلهم مرتبطين ببعض، وقال كمان ان كل (كون) ليه قصه مختلفه، يعني احنا في كوكب الارض بنقول ان ف بدايه الحياة كان في (ديناصورات) ومع وجود الآنسان أنقرضت صح ؟

عم "هيو إيفيرت" بقي بيقولك ان ممكن يكون حصل العكس في الكون التاني يعني الديناصورات منقرضتش وفضلت مكمله والبشر لما نزلت الارض معرفتش تتكيف مع الديناصورات وأنقرضت هي.

او مثلا البشر موجودين هناك بس بعدد قليل، او مثلا البشر هناك موجودين عادي بس أكثر تقدم مننا بكتير، او مثلا ان البشر هناك عايشين لسه في العصر البدائي وما قبل التكنولوجيا.

وهيو إيفيرت بيقول كمان ان ممكن يكون في الآكوان دي حياة تانيه وكائنات تانيه مش عندنا ومنعرفهاش اساسًا.

واحد هيقولي اي يعم الكلام ده ؟ لا أنا مش مصدق.

هقولك يرايق ده في ظل التقدم التكنولوجي الي احنا فيه حاليًا ف تلسكوباتنا قادره تشوف ما بعد كوننا ب 14 مليار سنه ضوئية بس.

انت تعرف بقي ايه الي بعد ال14 مليار سنه ضوئية دول ؟ تعرف موجود ايه ؟ تعرف في كواكب ولا لا ؟ تعرف في اكوان تانيه ولا لا ؟ تعرف في فضائيين ولا لا ؟

_ الإجابة يمعلم (لا) لان العلماء نفسهم شغالين علي الحوار ده وكله بيحاول يطور من نفسه عشان يقدروا يفكوا لغز الكون الي بقاله 13.8 مليار سنه في حاله تمدد من وقت (الآنفجار العظيم)، وانت معرفتك محدوده يعني كمثال انت متعرفش كان فيه ايه قبل الانفجار العظيم وبداية الكون صح ؟

اهو بالظبط أنت متعرفش في ايه خارج (نطاق الكون الي انت فيه).

هتقولي لا برضو مش مقتنع اوي.

_ هقولك العلماء كلها كانت زيك كده وبتقول علي هيو إيفيرت انه مجنون لحد ما تم تأكيد نظريته من خلال تجربة فكرية اسمها (quantum-suicide) "الآنتحار الكمي" ومن بعد التجربه دي وكلام هيو بدأ ينتشر من تاني ومن وقتها وتم إثبات إمكانية العوالم المتعددة ومن بعدها والعلماء والفيزيائيين والرياضيين توجهو للبحث في النظرية بشكل أعمق وظهر نظريات كتيير بعدها زي مثلا نظرية (الاوتار) (string theory) للعلماء كارل يونغ وألبرت إليس وسيجموند فرويد وقالوا ان في اكوان متوازيه وأشباه للبشر هناك كمان، وفي كمان نظرية (Theory of Everything) ل البرت اينشتاين.

هتقولي طب هو احنا نقدر نشوف الاكوان دي ؟

_هقولك علي حسب نظرية الآوتار صعب لان الآكوان دي (بتلتف) حول نفسها بحيث متظهرش في عالمنا، وبتقول نظرية الآوتار ان في حال إتصال الاكوان دي ببعض هيحصل تدفق وده هيسبب تفاعل وانفجار كبير زي الانفجار الي ظهر كوننا.

وفي عالم اسمه (ماكس تيجمارك) قال أن في 4 أكوان غيرنا وشبهنا في الخصائص الفيزيائية وكل حاجه.

بس المهم أنت شايف ايه ؟ شايف ان ممكن فعلا يكون في بشر غيرنا في كون تاني وكوكب تاني في مجره مختلفه ؟

وشايف ان ممكن يكون لينا أشباه في اكوان تانيه ؟

وعلي العموم انا كنت اتكلمت عن الموضوع ده في مقال مخصوص عن (الآكوان المتعدده) روح شوفه من اللينك ده هتفهم اكتر

المهم بعد كل ده علماء الفلك قالت انها هتهتم باستقبال اي موجات موجيه جايه من خارج الارض عشان تعرف هو في حياة خارج كوكب الارض ولا لا.

والبداية كانت سنة 1977 لما تم أستقبال موجات غريبه محدش لحد دلوقتي عرف مصدرها نهائي وكان أسمها "WoW" والموضوع أنتشر جدا وقتها ودي تم التقاطها بمرصد راديو جامعه ولايه "أوهايو". وأستمر الحوار ده زي ما هو كده لحد سنه 2015 لما تم أطلاق مشروع أسمه Breakthrough listen بواسطه (يوري ميلنر) وده بيهدف للتصنت ومراقبه ملايين النجوم الأقرب للشمس علي أمل اكتشاف عمليه بث فضائي ضاله او معتمده.

طب وحصل حاجه جديده من وقتها ؟

أه يرايق ، من أسبوعين كده تقريبا أكتشف علماء الفلك شئ غريب شبه اشارات الراديو جاي من نجم قريب للشمس وده نجم أحمر صغير بيبعد عننا حوالي 4.2 مليون سنه ضوئية أسمه (بروكسيما سنتوري) وعلطول تولي الموضوع كل القايمين علي Breakthrough listen باستخدام مرصد (باركس) الاسترالي لدراسة النجم (بروكسيما سنتوري) الي جاي منه الاشارات الي سموها (Blc_1)، و الغريب انهم من خلال الملحظات أكتشفوا ان الاشارات دي كان في اشارات شبيها ليها تمت ما بين أبريل ومايو 2019.

ولحد دلوقتي البحث شغال والموضوع ده منتشر جدا وهبسلكم المصادر تحت.

ده غير ان علماء موجات الراديو الفلكي كمان اكتشفوا منطقه فارغة مساحتها أكبر من كل المناطق الفارغه الي اكتشفناها قبل كده والمنطقة دي بعيد عننا بحوالي 8 مليار سنه ضوئية وقطرها بس بيصل ل مليار سنه ضوئية، أنت متخيل ؟

وفي المجره بتاعتنا بس في حوالي 30 منطقه فارغه محدش اكتشفهم لحد دلوقتي ولا حد يعرف فيهم ايه. وعايز اقولك ان الكون كله بقا في 10 تريليون مجره.

يعني عايز تقولي ان في فضائيين ؟

_ هو مش فضائيين بمعني فضائيين، انا أقصد ان في احتمال كبير يكون في حياة في كون غيرنا وزي ما في احتمال ان كل دي نظريات مش صح، ف في برضو احتمال ان يكون في منهم صح.

وفي كام حاجه كده الناس بتاخدها كدليل علي وجود حياة في مكان تاني.

زي مثلا تصريح ل (أوباما) رئيس امريكا السابق لما اتسأل :

هل هناك فضائيين؟

_ وكانت اجابته :

"هذه معلومات سرية ولا يمكنني ان اخبرك"

وزي كمان تصريح وزير الدفاع الكندي Paul hellyer الي قال ان :

الكائنات الفضائية لم تقم بزياره الأرض فقط بل ساهمت ايضا في تطوير بعض التكنولوجيا التي وصل لها البشر ومنهم من يعمل مع الحكومة الامريكيه.

وانا هسبلك قصتين أغرب من بعض تحت في الكومنتات ليهم علاقه برضو بالحوار اول واحده (قصة الظابط الامريكي ريتشارد بيرد).

والتانيه (قصة الطيارة 513)، عشان تعرف ان انا مروق عليك النهارده.

وبس يمعلم كده المقال خلص. قولي بقي انت شايف ايه ؟ وممكن فعلا يكون في اكوان موازية لينا ولا كل ده مجرد نظريات مش صح ؟