أهو البرنامج ده طلع فتوي من الأزهر من كام ساعه بتحكم علي كل المستخدمين بمسحه حالا.

 هو الحكاية كلها أن الابلكيشن ده بقي تريند علي سيرش جوجل في أخر يومين وهو برنامج بيخليك تقدر تحرك وجوه المتوفيين من خلال صورهم القديمة وده من خلال تقنية التزييف العميق، يعني بتنزل البرنامج وبتختار صوره معينه للمتوفي وبتلاقي الابلكيشن عملك الصوره فيديو بيظهر فيها المتوفي بيضحك وبيبصلك وبيتحرك، وكمان في ابلكيشن "كوري" بيخليك تقدر تاخد سيلفي مع المتوفي ويعمل نفس حركتك في الصوره من خلال تقنية غريبه وهتلاقي تاني مصدر أنا حاطه تحت بيتكلم عن الابلكيشن ده بالتفاصيل.

المهم،ولما الابلكيشن اتشهر اكتر واكتر طلع ان الحركات الي بتحصل في فيديو المتوفي دي بتبقي حركات حقيقية وان الي بيمثل الحركات دي هما موظفين في الmy heetiage.

يعني كمثال اوقات بيكون الصوره مش واضح فيها اسنان وشعر المتوفي ف البرنامج من خلال تقينة التزييف بيقدر يجمعلك كل الاجزاء الناقصه في صوره المتوفي من خلال موظفين حقيقين.

والابلكيشن بقاله كام يوم تريند اهو وناس كتير جربت تعمل صور المتوفيين عندهم عليه ف علطول طلع الأزهر من خلال الشيخ "عبدالحميد الأطرش" (رئيس لجنة الفتوي بالأزهر الشريف) وقال أن حكم الشرع في استخدام التطبيق ده "لا يجوز" .

ودعا مستخدمين الابلكيشن بمسحه وعدم أستخدامه تاني لأنه بيقوم بالتزييق العميق وده لا يجوز من الناحية الشرعية وقال ان في مخالفة كمان في أستخدمه.

الشيخ قال ان البرنامج ده بيدخل في باب التمثيل بالموتي وكلنا عارفين ان لا يجوز التمثيل بالموتي بأي حال من الأحوال، وقال ان الانسان كرمه الله ولازم تظل صورة الانسان مكرمة ومتروكة كما كانت قبل وفاته، وقال ان ما دام الانسان قد لقي ربه فينبغي أن تحفظ صورته ومكانته عند الله.

وقال كمان ان لا يجوز وضع صورة المتوفي علي جسد شخص آخر.

وقال ان اي شخص بيجيب صوره المتوفي وبيدخلها في الابلكيشن ده (لا يحترم الميت).

وحذر رئيس لجنه الفتوي في الازهر من أستخدام التطبيق وحذر كمان من خطورة السوشيال ميديا والتطبيقات الي بتظهر وقال ان يجب متابعه الاولاد من خلال الأسرة.

أنت متخيل ان حاجه بسيطه ممكن تعملها وانت مش مُدرك انت بتعمل ايه تطلع بالخطورة دي ؟

وده كان حكم الدين في الموضوع

أنا لما عملت سيرش عن الابلكيشن أكتر واكتر لقيت أن نسبه كبيره جدًا وبتوصل ل 99% من المستخدمين بتتدمر نفسيًا لما بتشوف صوره الشخص العزيز عليهم ومتوفي قدامهم بيتحرك وهتلاقيني سايبلك اسكرين لكام بوست تحت في الصور.

ولو انت فاكر ان الابلكيشن هيخليك تبتستم وترتاح بعد ما تشوف الفيديو الي هيظهرلك تبقي غلطان ده بالعكس هتدمر وهتعيط وفي ناس دخلت في اكتئاب شديد بسببه، يعني في بنت جربت تشوف نتيجه الابلكيشن ل صوره أمها المتوفيه ومن بعدها وهيا في حاله أكتئاب شديد وفقدت النطق.

وعشان كده انا قررت أكتب البوست ده دلوقتي لان انا لقيت التايم لاين عندي معظمه فيديوهات للمتوفيين والي بينزل الفيديوهات مبيبقاش عارف أن ده حرام، ف نزلت البوست عشان الكل يفهم ويعرف.

وكمان عشان الدين وحالتك النفسية بتقولك ان التطبيق " لا يجوز".

وانت لو تعرف حد بيجرب او هيفكر يجرب الابلكيشن اعمله منشن وقوله ان ده بيعتبر حرام لان صوره المتوفي لازم تفضل محفوظة زي ما هي.

وياريت الكل يعمل شير عشان المعلومه دي محدش تقريبًا يعرفها ومحدش اتكلم عنها لسه مع أنه موضوع مهم وفي ناس كتير جدا نزلت الابلكيشن وبتعمل صور المتوفيين، وانا عندي التايم لاين منتشر فيه بشكل مخيف.