هو موكب نقل المومياء في مصر يوم 3 أبريل هيفتح علينا وعلي مصر باب "لعنه" ؟

أهو ده خبر نزل النهارده في معظم الجرايد والصحف الاجنبيه بس تعرف ليه؟

بص يسيدي ، أكيد انت لاحظت أن في خلال أخر 48 ساعه الكوارث عماله تحصل واحده ورا التانيه هنا في مصر وكان أولهم حادثه قطار "سوهاج" الي مات فيها فوق ال32 واحد وربنا يرحمهم وبعدين أنهيار عقار "جسر السويس" الي مات فيه لحد دلوقتي حوالي "30" شخص والنهارده اهو لحد دلوقتي حصل كارثتين جداد اولهم انهيار جزء من كوبري تحت الانشاء اسمه "ترسا" ومن ثواني حصل حريق في نفق عرابي جنب محطه قطار الزقازيق وربنا يستر وميكنش في إصابات.

المهم يسيدي الكوارث دي خلت الصحف العالميه تنشر خبر بأن اللعنه حلت علي مصر خلاص بسبب حدث نقل المومياء الي هيحصل كمان 8 أيام وبسبب نقل المومياء من اماكنها، وفي كمان قصه مرعبه بدأت تتشهر من تاني.

والقصه دي بتقولك يمعلم أن سنه 1890 في علماء قدرت تكتشف مومياء في الاقصر وقرروا انهم يسرقوها وميبلغوش الحكومه المصريه عنها ويخرجوها من مصر بشكل سري والمومياء دي اسمها (آمن رع) وقدروا فعلا انهم يعملوا كده وده لأن وقتها مكنش في حكومه أوي واهتمام زي دلوقتي والمهم بعتوها يسيدي للمتحف البريطاني عشان تتعرض هناك، بس الي حصل ان الكوارث بدأت تحصل هناك وعلي حسب كلام "أمين المتحف البريطاني" أن بليل كان الكل هناك من عمال المتحف بيسمع صوت بكاء جاي من المومياء آمن رع واي حد كان بيحاول يقرب منها ويمسح الغبار عن وشها المرسوم علي التابوب كان بيُصاب بحصبه ويموت خلال 7 أيام ومنهم ابن مدير المتحف،وده الي خلي المتحف البريطاني يتخلص من المومياء دي في أسرع وقت

لأنه علي حسب كلامهم (مصابه باللعنه) وفعلا قرروا انهم يبعتوها لمتحف نيويورك سنه 1912، والمُرعب بقي ان وسيله نقل المومياء من بريطانيا ل نيويورك كانت "سفينه تايتنك الشهيره"

والمتحف البريطاني يمعلم بعت واحد اسمه (ويليام ستيد) بالمومياء علي السفينه عشان يسلمها بنفسه للمتحف الامريكي بس بمجرد ما دخلت المومياء سفينه تايتنك بدأت تحصل حاجات غريبه والركاب بقت تسمع اصوات بكاء شديد وده علي حسب كلام واحد اسمه (فريدريك كيمبر) وده ناجي من سفينه تايتنك وقال ان ويليام ستيد من وقت دخوله السفينه بالمومياء وهو كان مرعوب ومش بيقول غير جمله هنموت هنموت من لعنه الفرعون.

وبعد ما السفينه أتحركت يوم 14 أبريل 1912 أصطدمت بجبل جليد ومات 1500 شخص ومنهم ويليام ستيد الي كان جاي بالمومياء من المتحف البريطاني.

وكله وقتها قال ان المومياء المصريه آمن رع هيي السبب.

طب وحصل ايه بعدها ؟

هقولك يرايق مومياء آمن رع اختفت وفي علماء بتقول انها اكيد في المحيط الاطلنطي دلوقتي بس هيا لحد يومنا ده ملهاش اي أثر.

والقصه المُرعبه دي مشهوره جدًا وفي كتير كتب عنها ومنهم مارجوري كايجل في كتابه كنوز المتحف البريطاني سنه 1985، ولحد دلوقتي لُغز المومياء دي مجهول.

وكمان كتاب ما وراء الطبيعه قصه "الفرعون" الي اتعملها حلقه مخصوص في مسلسل ما وراء الطبيعه الي نزل في شهر 11 واعتقد كله شافه.

بس تفتكر الاحداث المُرعبه الي ظهرت في المسلسل بعد ما تم نقل المومياء من مكانها ممكن تحصل بجد؟؟

وأهو الي بيحصل في مصر بقاله يومين ده خلي الصحف العالميه المشهوره زي (واشنطن بوست ونينويورك تايمز) تقولك ان "لعنه الفراعنه حلت علي مصر"

وده لأن يوم 3 أبريل الجاي هيتم نقل ٢٢ مومياء ملكيه بليل من الباب الرئيسي للمتحف المصري في ميدان التحرير وهيتم حمل المومياء دي علي عربيات مصممه بالطراز الفرعوني وهيكون فوقها صناديق زجاج باين منها المومياوات بشكل كلي وبعدين هيتم ضرب ٢١ طلقه في الهواء وبعدين هتخرج عربيه عربيه من المتحف والانوار هتضئ في ميدان التحرير والنيل والمسلات والموكب هيتحرك من التحرير لحد المتحف القومي في عين الصيره عشان يكون منطقه جذب سياحي وبعد ما توصل المومياوات دي هتتحط في قاعه مخصصه وهتستقبل السياح.

والحدث ده مهم جدًا عالميًا وهيشارك فيه ناس كتيييير زي هند صبري ونيللي كريم ويسرا واحمد حلمي ومني زكي وهيكونوا لابسين لبس فرعوني كامل، وكمان هيتم أذاعه الخبر في كل القنوات الاجنبيه والعربيه والعالم كله مستني الحدث ده الي هيكون من أهم الاحداث سنه 2021 وهينقل مصر سياحيًا في حته تانيه خالص.

بس تفتكر يرايق ممكن يكون كلام الصحف العالميه صح ؟؟ ويكون الملوك الفرعونيه حاسين ان دي إهانه ليهم ولمكانتهم ومش راضيين عن فكره الموكب وظهور جثثهم قدام العالم كله والتمثيل بجثثهم كده؟

وكمان عايز أقولك ان ال22 ملك الي هيتم نقلهم ملوك كبار جدا ومشهورين زي ،الملكه نفرتاري زوجه أحمس، والملك أمنحتب الاول، والملك تحتمس الاول ، والملكه حتشبسوت، وامنحوتب التاني، وتحتمس الرابع، والملك سيتي الاول ، مرنبتاح، سيتي التاني، رمسيس التالت،رمسيس التاسع.

وهتلاقي اسماء الملوك بشكل كامل في اول كومنت.

بس تفتكر ممكن يكون الملوك الي كان ليهم شأن عظيم من حوالي 3000 سنه هتنتقم من أحفادها ؟